CAGAYAN DE ORO CITY – Gimatud-an sa 4th time bar taker nga dili babag ang daghang pagsulay sa pagkab-ot sa pagsilbing abogado.
Kini ang pagsaysay ni Atty Johana Pascua kinsa kabahin sa sobra 3-mil nga pasado sa 2024 bar examinations nga giapilan sa kapin 10-mil ka bar takers tibuok nasud sa miaging Setyembre ning tuiga.
Sa interbyu sa Bombo Radyo, dili lalim ang iyang naagian kay nagsunod-sunod ang iyang pakyas nga pagpasar sugod tuig 2007 hangtod nga hingpit nakuha ang tinguha sa bar exam ning tuiga.
Siya miingon nga tungod sa iyang kagustuhan nga mahimong hingpit nga abogado,gihimo iya nga hagit ug gabayan ang mga pagtulun-an nga nakuha niya sa wala niya pagpasar.
Mipaubos kini sa refresher course isip mando sa Korte Suprema ayha mikuha’g rebyo pinaagi sa online class hangtod nga mikuha’g pasulit sa miaging bulan ug kabahin na sa nagpasar.
Miingon si Pascua nga pamatood kini nga kon kanunay ang pagsalig sa tawo sa kahitas-an ug ubanan sa pagpursige, moabot ang higayon nga makuha niya sa hingpit ang iyang gitinguha sa kinabuhi.
Kasamtangan si Pascua ang nagsilbing special investigation 3 sa Department of Education 10 nga nakabase ning syudad.
Si Pascua ang kanhi usab nahimong kabahin sa Bombo Radyo apan kay tawag niya ang pagsilbing abogado,wala na niya ihinayon ang broadcast career sa media industry.
Hisayrang daan nagsaad kaniadto si Pascua nga kon magpasar kini sa abogasiya,una niya hatagan sa interbyu ang Bombo Radyo.
