CAGAYAN DE ORO CITY – Bintaha alang sa taga -Commission on Elections o Comelec ang istrikto nga ‘substitution policy’ tali sa mga kandidato nga molambigit sa taliabot 2025 elections sa nasud.
Kini human gimando ni Comelec chairman George Garcia nga sulod lang sa walo ka adlaw gitugot ang candidate substitution sukwahi sa nanglabay’ng mga piliay sa nasud.
Namahayag si Comelec 10 regional director Atty Renato Magbutay nga paagi kini sa komisyon aron putlon ang mga pag-drama sa mga politiko aron danihon ang mga botante.
Siya miingon nga mas mapadali usab ang trabaho sa Comelec kon masugdan na kini’g patuman sa sunod tuig nga piliay.
Samtang gilauman sa Comelec 10 nga mosobra pa sa ilang target registered voters ang makuha sa Northern Mindanao ning tuiga.
Gikopirmaha ni Magbutay nga nakuha na nila ang 5 porsiento nga dugang registered voters nunot sa ongoing registrations sa ilang mga opisina palibot sa rehiyon.
Miingon si Magbutay nga layo pa ang Setyembre aron pagsira sa registration period apan nakuptan na nila ang dugang 150-mil ka bag-ong rehistradong mga botante alang sa 2025 elections dinhi lang sa rehiyon.
