CAGAYAN DE ORO CITY- Nalata ang ulo sa usa ka menor de edad human malatayan sa elf-trak samtang nagdula diha sa Mabolo St, Brgy Carmen ning syudad.
Giila ang namatay nga si Bryce Barcioda, 5-anyos ug residente sa maong lugar.
Sumala sa trak driver nga si Ravie Bonalos, 24-anyos ug residente sa Kibawe, Bukidnon nga nawad-an siya’g kontrol sa manibela samtang gibitad kini sa laing sakyanan hinungdan nga mibangga kini sa biktima.
Nakaangkon og dakong samad sa iyang ulo ang biktima nga maoy hinungdan sa iyang kamatayon. Samtang sabutan pa sa pamilya sa 5-anyos nga biktima kung magpasaka sila’g kaso sa driver sa trak.
Matud ni Maybelle Barcioda, iyaan sa biktima nga kanunay niya makita ang drayber nga si Bonalos ug parason kini nga magmaneho sa sakyanan.
Nakurat si Barcioda sa gidangatan sa iyang pag-umangkon ilabina nga igo lamang kini nga nagdula gawas sa ilang panimalay.
Hisayran nga wala na madala sa balay-tambalanan ang biktima tungod sa dakong samad sa ulo nga naangkon niini.
