CAGAYAN DE ORO CITY –Nasikop sa follow up operations sa kapolisan ang lima ka tawo nga suspek pagpusil-patay sa sibilyan sa Purok 1-A,Brgy Lala Proper,Lala,Lanao del Norte.
Kini human unang gipusil sa wala matumbok nga hinungdan ang biktima nga si Roel Ayunting,41 anyos,ulitawo nga taga-Tubod sa maong lungsod.
Miingon si Lala Police Station commander Maj Jonan Bañas nga nagbaklay lamang ang biktima dihang kalit gipusil sa mga suspek nga sila si Rhey Paolo Palma,William Abreo,Roy Alabata, Napoleon Balhon Jr, Roy Alabata ug Russeller Pomicpic hinungdan sa kamatayon niini.
Natumbok ang mga suspek tungod sa pagtug-an sa grupo sa mga tawo nga nag-jogging sa lugar diin ilang nakit-an ang biktima nga nagbuy-od ug wala na’y kinabuhi.
Mismo usab si Palma kinsa nag-drive sa Isuzu Sportivo color hunter green ang mitug-an nga sila ang mihimo sa kremin.
Gihikay na ang kasong murder nga ipasaka sa kapolisan batok sa mga suspek sa piskalya sa maong lugar ning adlawa.
