CAGAYAN DE ORO CITY – Gikasuhan na ang 18 ka suspek nga naglakip sa lima ka Chinese nationals nga nalambigit sa illegal mining operation sa Brgy Pigsag-an nga nagsilbing utlanan sa kabarangayan sa Cauyonan ug Nangcaon sa Opol,Misamis Oriental.
Kini human nasupak sa maong mga suspek ang walo ka environmental laws diin pinaka-grabeng apektado ang Iponan River ning syudad.
Gibutyag ni Atty Ban Mikhael Pacuribot, chief sa legal division sa MGB Region-10 nga dunay walo ka violation nga nahimo ang mga suspek sa illegal nga pag-mina sa maong suba.
Mo-abot usab sa 30-ka milyon ka pesos ang kantidad sa mga ekipos ang ilang nakonpiska gikan sa mga suspek nga naglakip sa mga dumptruck ug backhoe.
Samtang gikompirmar usab MGB 10 regional director Felizardo Gacad Jr nga mo-abot sa 10.3 ka ektarya nga luna ang gidaut sa mga suspek pinaagi sa illegal nga pag-mina sa bukirang bahin sa syudad ug lalawigan.
Kini subay sa actual nga pagsusi sa composite team ug sa kuha nga aeral shots sa mismong illegal mining sites.
Gipasalig usab niini nga ilang ipadayon ang pag-monitor sa Iponan river aron masumpo ang mga illegal nga kalihukan nga makadaut sa kina-iyahan.
Gipangayo usab ni Gacad ang panabang sa katawhan aron mapanalipdan ang Iponan river.
Sa pikas bahin,gibulgar ni Opol Mayor Jay Bago nga pipila sa iyang mga barangay kapitan ang mismong protektor sa ilegal mining operations sa pipila ka bahin sa bukirang bahin sa ilang lungsod.
Kini samtang gikalipay sa mayor ang malampusong operasyon sa composite aron makuha ang lima ka Chinese nationals ug mga trabahanteng Pinoy nga kaabag sa ilegal nga kalihukan.
Nagtoo si Bago nga dugay na ang maong kalihukang ilegal nga gipasagdan lang sa kanhi namunuan sa ilang lungsod.
Sa pikas bahin,nagbaton sa protector sulod sa Mines and Geosciences Bureau o MGB 10 ang pipila ka Chinese nationals rason nga sayon kanila ang paghimo sa illegla mining activities sa pipila ka bahin sa bukiran sa syudad ug lalawigan.
Miingon si CLENRO manager Engr Armen Cuenca nga mismo sila ang nagbaton sa ebedensiya nga miangkon ang usa ka Intsik nga nagkuha kini’g proteksyon gikan mismo sa MGB aron maka-operate sa ilegal mining.
Apan nagdumili si Cuenca pagtug-an kon kinsa ang maong taga-MGB nga giingong protektor sa illegal miners kay gitugyan nila kini sa kadagkuan sa DENR ang pagbulgar sa pangalan.
