CAGAYAN DE ORO CITY – Detinado sa NBI- 10 ang lima ka Chinese nationals ug 13 ka Pinoy workers nga giakusahan nga nalambigit sa illegal mining operations sa porsyon sa Cagayan de Oro ug Opol,Misamis Oriental.
Kini human unang gipaubos sa inquest proceedings sa provincial prosecutor’s office ang mga dinakpan tungod sa kasong ilegal mining.
Miingon si CLENRO manager Engr Armen Cuenca nga nagpatoo ang mga suspek nga mihimo’g quarry operations apan mga bulawan ang nag-unang tuyo sa ilang pagkalut-kalot sa bukiran.
Nadakpan ang mga suspek tungod sa hiniusang operasyon sa DENR 10,MGB- 10 ingon man sa NBI 10 ug 1st Special Forces Batallion sa 4th ID,Philippine Army sa miaging adlaw’ng Sabado.
Kini ang labing dako nga kalampusan nga nahimo sa gobierno batok sa mga suspek sa isyu sa illegal mining diin daghang ekipo ang nabawi gikan sa lugar diin natigayon ang pagmina-mina.
