CAGAYAN DE ORO CITY, Philippines – E-tratar sa Department of Justice isip regular nga kaso ang gisang-at nga lima ka ihap nga kasong kriminal sa National Bureau of Investigation (NBI) batok Bise Presidente Sara Duterte.
Nunot kini sa iyang pagpanghulga sa kinabuhi nila Presidente Bongbong Marcos, iyang kapikas ug House Speaker Martin Romualdez nga sila ipapatay.
Namahayag si DOJ Usec Jesse Andres nga sa initial evaluation sa kaso, susihon sa ahensya ang pagrepaso sa mga gisumiter nga mga ebidensya sa NBI, ug timbang timbangon kung kini husto na ba aron makamugna “case build up” sa kaso, ug e file ang kasong kriminal sa regular nga korte.
Apan gitin-aw ni Andres nga kung kulang sa merito ang ebidensya mahimo kining ibasura sa DOJ. Ubos sa initial evaluation, hatagan sa ahensya sa higayon si VP Sara nga linawas nga muatubang ug mupadayag sa iyang kontra-demanda pinaagi sa pag subpoena kaniya.
Kini nagpasabot nga muabante ang pagdungog sa iyang kaso mo-kooperar man o dili ang bise presidente.
