Lima ka dump truck nga puno sa 15 cubic meters nga basura ang nahabwa sa Department of Public Works and Highways (DPWH) -10 sa gilusad nga declogging operations sa Kauswagan National Highway, miaging semana.
Kini ang gikompirmar ni DPWH-10 Spokesperson Novie Cabrido sa Bombo Radyo, human nakadawat sa subli sa grabeng batikos ang ilang buhatan batok sa mga gimugna nga mga dagkung drainage sa maong dalan.
Mipasabot si Cabrido nga bisan gipadag-an ang drainage canal puno gihapon sa basura ang maong dapit hinungdan nga mu-awas ang tubig niini sa kadalanan.
Siya miingon nga adunay regular nga declogging ug desilting operations ang ilang buhatan aron malikayan ang grabeng pagbaha ilabe sa mga dalan nga lisud maagian kay paspas ang pagsaka sa tubig baha.
Gi-awhag sa ahensya ang mga residente sa maong barangay nga disiplinahon ang kaugalingon sa paglabay sa ilang basura kay sila ra ang maunay sa ilang pagka-eresponsabli.
