CAGAYAN DE ORO CITY – Mag-atubang sa susamang kasong pagsupak sa Republic Act 9165 ang lima ka suspected drug pushers nga nadakpan sa kapolisan sa magkalahing operasyon sa tulo ka lugar sa Northern Mindanao.
Gisaysay sa impormasyong nakaabot kang Police Regional Office 10 Director Brig Gen Jaysen De Guzman nga unang operasyon gilusad sa mga operatiba sa Provincial Drug Enforcement Unit sa Misamis Oriental Police Provincial Office diin nadakpan ang usa ka alyas JR,32 anyos nga nagpuyo sa Sitio Calatrava,Brgy Cogon,Balingasag ning lalawigan.
Nabawian ang dinakpan sa 60 gramos sa gitoohang shabu nga nagbalor sa 408-mi pesos.
Gikasa usab ang parehang operasyon sa mga operatiba sa Malaybalay City Police Office kuyog ang intelligence operatives ug PDEA 10 team diin ilang nadakpan ang high value target sa Brgy 9 sa maong lugar.
Nadakpan si alyas Eddie,34 anyos nga nabawian usab sa sobra 40 gramos nga gitohoang shabu nga adunay kantidad nga 272-mil 500 pesos.
Wala nagpaulahi ang mga operatiba sa Iligan City Police Office diin nasignit nila ang tulo ka suspected shabu sellers sa Purok 6,Brgy Pala-o,Iligan City.
Kini gilakipan nila alyas Jerry,32 anyos; Jun-jun,42 anyos ug alyas JB,36 anyos nga pulos nagpuyo sa lugar diin sila nakuhaan sa 65 gramos sa gitoohang shabu nga adunay 442-mil pesos nga kantidad.
Tungod sa ilang mga binuhatan diin sila nabawian sa sobra milyon pesos nga kantidad sa shabu,kini kasuhan sa pagsupak sa Comprehensive Dangerous Drugs Act of 2002 o RA 9165.
