CAGAYAN DE ORO CITY – Mabalik na padulong South Korea ang 5-mil ka tonelada sa mga basura nga gipalusot ug gilabay sa Verde Soko Philippines diha sa Sitio Bugwak,Brgy Sta Cruz,Tagoloan,Misamis Oriental ning bulana.
Kini ang gikompirmar ni Mindanao Container Terminal o MCT collector ug Bureau of Customs Cagayan de Oro concurrent head John Simon nunot sa gihimo nga govt inter-agency meeting kabahin sa maong hisgutan sa syudad kagahapong adlawa.
Miingon si Simon nga sugdan ang pagsulod sa maong mga basura sa 250 ka container vans sunod semana sa planta sa Verde Soko ayha isulod sa MCT.
Una nang gibutyag ni Simon nga ang barko sa Maersk Shipping Lines maoy kargahan sa mga basura pabalik sa South Korea.
