CAGAYAN DE ORO CITY – Gihulat karon sa aviation police office nga magpakita ang tag-iya ug ang shipper sa 5-mil 997 ka buok nga tag-100 trillion Zimbabwean dollars nga nakompiskar sulod sa airport sa Laguindingan,Misamis Oriental.
Kini human usa ka kanhi mayor sa Roxas,Zamboanga del Norte ang nagpaila nga tag-iya sa maong nabawi nga salapi.
Gibutyag ni Police Col. Raniel Valones, hepe sa aviation security unit nga unang gipatoo nga mga basura nga gisulod sa tulo ka package ang maong mga salapi nga ipalusot unta padulong sa kauluhan.
Nasuta nga anaa sa 124 mil pesos ang kantidad sa maong mga salapi kon e-convert sa Philippine currency apan dili matino kon tinud-anay usab kini nga bank notes nga gikan sa Zimbabwe.
