CAGAYAN DE ORO CITY – Gihukman sa korte sa tibuok kinabuhi nga pagkabilanggo ang lima ka kanhi pulis nga unang nagsilbing akusado sa pagdagit sa negosyanteng si Enrique ‘Eking’ Fernandez III sa Uptown,Upper Balulang sa syudad sa miaging Nobyembre 2016.
Miingon ang amahan nga si Enrique ‘Eric’ Fernandez II nga tag-40 ka tuig ang gipahamtang sa Regional Trial Court Branch 17 batok sa mga akusado nga sila kanhi Police Sr Insp Irenio Ramirez;SPO2 Jojo Lim; SPO2 Alaindelon Tacubao;PO2 Sangkulan Hussien II ug PO2 Alejandro Ubanan nga pulos sakop kaniadto sa usa ka special unit sa Cagayan de Oro City Police Office o COCPO sa syudad.
Dumduman nga padulong na pauli si Fernandez sa dihang gihulatan kini sa grupo ni Ramirez ug pagsanong gipasakay sa ilang get away vehicle ayha gidala sa ilang safe house.
Apan nagtoo ang pamilya nga gipatay na sa mga akusado si Eking kay hangtod karon wala na makabalik sa ilang pinuy-anan sukad kini gidagit sa maong tuig.
