CAGAYAN DE ORO CITY -Mahidangat na sa dili madugay ang patay’ng lawas sa lima ka sakop sa pamilya Maglente sa Greenville,Brg Bugo gikan sa Polomolok,South Cotabato.
Nunot kini sa pagka-kumpleto na sa mga papeles ug paghidangat sa makargahan nga mga sakyanan sa mga biktima pabalik dinhi sa syudad.
Gibutyag ni Emil Sumagaysay,hepe sa Tupi Local Disaster Risk Reduction Management Council nga nakahukom ang mga kabanay sa pamilya Maglente nga ihaya pa’g dugang sila dinhi sa syudad ayha hatagan sa katapusang pahulayan sa sunod semana.
Miingon si Sumagaysay nga naglugwa usab sila’g voluntary financial funds alang sa dugang pagpahimutang sa nahisgutang mga biktima.
Dumduman nga kabahin sa mga namatay tungod sa aksidente sila Joel Maglente,kapikas nga si Annabelle ingon man ang ilang tulo ka anak ug duha ka pulos menor de edad nga pag-umangkon niadtong Disyembre 23 sa hapon.
Hisayrang lumad nga taga-South Cotabato si Annabelle samtang si Joel naggikan usab sa Tagoloan,Misamis Oriental diin uban sa iyang mga igsoon nagpuyo usab sa Cagayan de Oro.
