PC:Sedrathul Montaha RN Crna
CAGAYAN DE ORO CITY- Patay ang lima ka sakop ni Maute-ISIS sub-commander Owayda Benito Marohombsar alyas Abu Dar sa air ug ground army assault sa lungsod sa Tubaran ug Pagayawan,Lanao del Sur.
Kini subay sa report gikan sa encounter site diin nasangka sa militar ang 40 ka sakop ni Abu Dar sukad pa sa adlaw’ng Domingo.
Gibutyag ni Joint Task Force Ranao deputy commander Col Romeo Brawner sa eksklusibong interbyu sa Bombo Radyo nga kini ang gitinguha nila nga ma-rekober aron mapatud-an nga napatyan ang mga terorista.
Miingon si Brawner nga natultulan nila ang kampo ni Abu Dar tungod sa pagpatay niini kang Malaganding Brgy Kapitan Hadji Ansary sa lungsod sa Tubaran niadtong Mayo ning tuiga.
Samtang misaka pa sa mi-300 ka pamilya o 5-mil 079 ka indibidwal ang napugos paghawa sa ilang mga pinuy-anan epekto sa military offensive batok sa 40 ka sakop sa Maute-ISIS group nga nagkampo sa bukiran sa Pagawayan ug Tubaran,Lanao del Sur.
Gibutyag ni ARMM 1st District Assemblyman Zia Alonto Adiong nga nahimutang ang mga bakwit sa lungsod sa Bayang ug Binidayan samtang wala pa’y pagtugot ang militar ibalik sila sa mga pinuy-anan niini.
Gawas sa relief goods,nagkinahanglan ang mga bakwit sa mga tambal ug dugang medical staff samtang naka-house sila sa evacuation centers sa lugar.
