Labing menos lima ka tawo ang nasamdan sa mga pag-atake sa petrochemical companies sa Khuzestan province sa Iran, Sabado sa buntag.
Ang mga kompanya nga Fajr 1 ug 2, Regal, Amirkabir, Bandar Imam ug Buali Sina ang naigo alas 10:47 sa buntag.
Gibutyag ni Valiollah Hayati, deputy governor sa seguridad ug law enforcement, nga posible pa nga mosaka ang ihap sa mga biktima.
Ang Shalamcheh border trade terminal sa Khorramshahr city naapektohan usab ug grabe ang kadaot.
Ang Mahshahr Special Petrochemical Zone, diin nahimutang ang mga kompanya, gi-evacuate na.
Mahinumduman niadtong Pebrero 28, unang milunsad ang Israel ug U.S. sa joint attacks sa Tehran ug uban pang syudad sa Iran nga nakapatay sa Supreme Leader Ali Khamenei ug daghang opisyal ug sibilyan, nga gisukli-an sa Iran pinaagi sa missile ug drone strikes batok sa Israel ug U.S. assets sa Middle East.
