CAGAYAN DE ORO CITY – Patay ang lima ka tawo sa pagtay-og sa 6.3 magnitude nga linog sa pipila ka bahin sa Mindanao kagabii.
Sa interbyu sa Bombo Radyo kang Phivolcs Director Renato Solidum nga nasubay ang sentro sa linog sa Tulunan,North Cotabato nga tectonic in origin ug 15 kilometros ang ginlawmon.
Miingon si Solidum nga nakahatag sa dakong damyos ang kakusgon sa linog diin natala ang intensity 7 ug 6 sa mismong pipila ka bahin sa North Cotabato.
Subay sa nakuhang impormasyon sa Bombo Radyo,usa ka 7-
anyos nga batang babaye ang namatay sa pagkahugmak sa ilang panimalay sa Datu Paglas.
Samtang sa M’lang, gikompirmar ni Vice Mayor Joselito Pinol nga usa ka tawo ang namatay human gi-atake sa kasing-kasing.
Laing dos-anyos nga bata ang naigo sa atop sa pagkahugno sa ilang balay tungod sa linog sa Magsaysay, Davao del Sur.
Nalakip pagkalubong sa midahili nga yuta ang balay nga gipuy-an sa usa ka inahan ug iyang anak.
Base sa report sa National Disaster Risk Reduction and Management Council, 17 ka tawo ang samaron sa Makilala ug laing 60 ka tawo ang nadala sa ospital human sa kusog nga pagtay-og sa Tulunan, North Cotabat;Magsaysay ug Digos sa Davao del Sur.
Mitala na usab ang Philippine Volcanology and Siesmology sa kapin 260 ka aftershocks human sa linog kagabii.
Subli nagpadumdum ang NDRRMC sa katawhan nga dili magpanic panahon sa linog.
Nasunog usab ang usa ka mall sa General Santos samtang anaa sa 20 ka tawo ang nadala sa nagkadaiyang ospital kagabii.
Nabati usab ang intensity 3 sa Cagayan de Oro City ug ubang bahin sa Bukidnon ug Misamis Oriental.
