CAGAYAN DE ORO CITY – Nahurot sa pagkamatay ang usa ka pamilya nga lulan sa motorsiklo dihang gikabangga wing van nga kargado sa mga ligid sa national highway sa Brgy Gimangpang,Initao,Misamis Oriental.
Kini subay sa impormasyon nga gipaabot sa Initao Police Station ngadto kang Misamis Oriental Police Provincial Office Director Col. Wilbur Salaguste kabahin sa hitabo mismo sa kasaulugan sa Valentines Day.
Sa maong hitabo,gitoohang gikan sa direksyo sa Cagayan de Oro City ang mga biktima nga sakay sa motorsiklo ug giingong pauli na sa Iligan City dihang natigayon ang dugu-ong aksidente.
Subay usab sa mga saksi, mihimo’g pag-overtake ang motorsiklo sa gisundan nga pribadong sakyanan apan nasugat nila ang kargado’g mga ligid nga van hinungdan sa grabeng epekto sa bangga.
Dead on the spot ang mga biktima diin sila kasamtangang gidala una sa punerarya nga nahimutang sa Brgy San Pedro sa maong lungsod.
Saysay sa wing van driver nga detinado na sa mini-cell sa kapolisan nga naglisod na kini’g likay tungod sa kalit nga pag-overtake sa mga biktima rason sa ilang panagsungag.
Hisayrang kabahin sa namatay ang magtiayon kuyog sa ilang mga anak nga gilangkuban sa babaye ug duha ka lalaki nga nag-edad 10,8 ingon man 5.
