Gipangulohan ni Mayor Alexis Quina sa Balingasag ug ni Mayor Franz Angelo Capistrano sa Lagonglong ang pag-turnover sa pinansyal nga tabang ngadto sa lima ka former rebels. Sila Arman Jariol alyas BILOG, Alvin Redondo alyas AKLAS, Radie Tandayon alyas REJIM, Arturo Colao, ug Elsa Hilogon alyas AYA ang nakadawat sa pinansyal nga tabang sa duha ka LGU. Ang inisyatibo kabahin sa localized reintegration efforts sa gobyerno aron matabangan ang mga FRs nga mobalik sa sabakan sa balaod ug makasugod sa bag-ong kinabuhi. Ang tabang pinansyal maoy nag-unang suporta alang sa ilang panginahanglan ug kapital sa panginabuhi sa mga rebel returnees. Ang LGU Balingasag ug Lagonglong nakig-koordinar sa 58th Infantry Battalion ubos ni LTC Leoncito Grezula Jr. ug sa 402nd Infantry Brigade sa 4th Infantry (Diamond) Division aron masiguro ang kaluwasan ug hapsay nga integrasyon. Gipadayag ni Mayor Quina nga ang tumong mao ang pagtukod sa komunidad diin ang tanan makapahimulos sa kalinaw, samtang si Mayor Capistrano nagpasabot sa kahinungdanon sa inter-LGU kolaborasyon alang sa inklusibong kalinaw. Ang seremonya nga gitambongan ni BGEN Adolfo B. Espuelas Jr. ug ni 2LT Mary Evangelyn R. Duronio nagpakita sa kalampusan sa Enhanced Comprehensive Local Integration Program (E-CLIP) ug nagpalig-on sa paningkamot sa Misamis Oriental alang sa dugay nga kalinaw ug kalamboan.
