CAGAYAN DE ORO CITY – Gitakdang mahidangat ang lima sa 47 ka patay’ng lawas sa mga sundalo sa kanhi Lumbia Airport ning syudad nga kabahin sa nakasakay sa nahagsa nga C-130 Hercules plane sa Patikul,Sulu.
Gibutyag sa bag-ong tigpamaba sa 4th ID,Philippine Army nga si Maj Francisco Garello Jr nga ang maong ihap sa mga nailhan na nga sundalo ang ihaya una sulod sa Camp Evangelista ayha ihatod sa tagsa-tagsa ka pamilya niini.
Miingon si Garello nga hatagan usab sa taas nga pagtahod ug pag-ila ang maong mga sundalo kinsa una nang giduaw ni Pres Rodrigo Duterte samtang gitapok sila sa Zamboanga City sa miaging adlaw.
Daghang sa mga sundalo nga namatay ug samaron gikan mismo dinhi sa 4th ID ug gitahasan sa pagpulbos sa terorista apan nagka-problema ang pagtugpa sa eroplano sa Jolo Airport sa miaging adlaw’ng Domingo.
Samtang gibalik-lantaw ni 4th ID,Philippine Army commanding officer Maj Gen Romeo Brawner Jr kon unsa siya ka suwerte kuyog sa iyang pamilya nga nakalinggawas sa trahedya gikan sa pagsakay sa C-130 Hercules plane sa miaging adlaw’ng Domingo.
Kini human mismo ang maong eroplano ang nagkuha kaniya sa Villamor Airbase padulong sa Camp Evangelista alang sa iyang pagtake-over sa gibakante nga posisyon ni Maj Gen Andres Centino.
Miingon si Brawner nga nanindog ang iyang balahibo sa dihang nasayran nga ang abyon nga gisakyan niini ang nahagsa samtang karga ang bag-ong mga sundalo gikan sa Northern Mindanao pag-abot sa tugphanan sa Jolo,Sulu.
Dugtong niini,ipadala ni AFP chief of staff Gen Cirilito Sobejana ang duha ka block box sa nahagsa nga C-130 plane sa Amerika.
Kini aron mabuksan ug masayran kon unsa ang ulahi nga gipanagsultihan sa mga pilito ug crew sa maong eroplano sa wala pa hingpit mahagsa nga gikamatay sa 47 ka sundalo ug 3 ka sibilyan sa Patikul,Sulu.
Gibutyag ni Sobejana nga bugtong Amerika lamang ang may kapas sa pagsusi niini sanglit sila ang tag-iya sa maong eroplano gigamit sa humanintarian transport services palibot dinhi sa nasud.
