CAGAYAN DE ORO CITY – Mag-atubang sa kasong pagpanulis ang lima ka suspek nga nadakpan pinasikad sa gilusad nga checkpoint sa Sayre Highway,Brgy Tankulan,Manolo Fortich,Bukidnon.
Subay sa taho nga nakaabot sa Police Regional Office 10 gikan sa Manolo Fortich Municipal Police Station nga maoy gitulis ang dakong patigayon nga nakabase sa Zone 4,Brgy Maluko sa maong lungsod.
Sa pasiunang imbestigasyon, gilusob sa mga tulisan ang patigayon ug paspas gipangkarga sa trak ang mga baterya nga adunay sobra tunga milyones pesos nga balor.
Gilayong misibat ang mga dinakpan apan nag-atang na ang kapolisan sa Sayre highway rason nga naharang ug nabawi ang mga gipangkawat nga mga baterya.
Nabawian usab sa mga otoridad ang kalibre 45 nga armas kuyog ang dul-an napulo ka bala gikan sa usa sa mga dinakpan.
Kasuhan sa pagpanulis ug kasupakan sa gun ban ang mga suspek nga nabalhog sa mini-cell sa kapolisan sa piskalya sa Bukidnon ugmang adlawa.
