Mipanaw na sa laing kalibutan ang Five-time Olympic champion ug Hungarian gymnast Agnes Keleti sa edad 103.
Gikompirmar kini sa Hungarian Olympic Committee Naila ang olympic champion sa ngalang Agnes Klein ug natawo sa Budapest niadtong Enero 9, 1921 ug nasugdan niya ang iyang olympic career sa National Gymnastics Association tuig 1938.
Iyang nadag-an ang labing unang Hungarian championship tuig 1940.
Human sa iyang pagkampeon, gibawalan kini sa pagtampo sa tanang matang sa paugnat sa kusog tungod sa iyang Jewish origin.
Gibutyag sa International Olympic Committee nga usa sa pinakamaayong gymnast sa Hungary si Keleti apan nasagulan sa pulitika ang iyang karera ug gigamit nga hinagiban sa iyang mga kaatbang ang iyang relihiyon.
Panahon sa paghari ni Adolf Hitler, nakalikay pa si Keleti sa kamatayon human naka-ikyas kini sulod sa Nazi death camps diin daghang Hungarian Jews ang gipangpatay.
Nalutsan niya ang daghang pagsulay human mitago kini sa usa ka lugar sa Budapest gamit ang peke nga mga papeles.
Subli nahimong kampeon ang dalaga dihang misalmot kini sa Helsinki games tuig 1952 sa edad 31.
Kini nga edad maoy retiring sa halos tanan gymnast.
Iyang nakab-ot ang pinakataas ang uyukan sa iyang karera sa Melbourne Australia, tuig 1956 human iyang giharus ang upat ka mga medalyang bulawan ug giila isip labing tigulang nga babayeng gymnast nga midaug sa bulawang medalya.
Human sa usa ka tuig, mibalhin kini sa nasud sa Israel ug didto na nakapundar sa pamilya, diin, nahatagan siya sa duha ka anak.
Ang napulo ka mga olympic medals, lakip na ang lima ka bulawan ang maoy nag-ila kang Keleti isip ikaduha sa pinakamalampusong atleta sa Hungary.(Bombo Anne Quileste).
