CAGAYAN DE ORO CITY – Igo lang gipahimanguan ug gidid-an sa DENR-MGB 10 ang utok sa illegal mining operations sa Brgy Tumpagon padulong Brgy Tuburan nga dili na sublion ang mga kalihukang ilegal sulod sa hurisdiksyon sa dakbayan.
Kini ang resulta sa technical conference nga gihimmo sa maong mga ahensiya nunot sa adhoc committee investigation sa konseho nunot sa reklamo sa illegal mining activities nga hinimuan sa pipila ka Chinese nationals sa syudad sa miaging mga bulan.
Miingon si adhoc committee chairman ug committee on environment committee head Kag. Roger Abaday nga tipik sa gitumbok nga financier sa illegal mining operations ang usa ka Patrick Lam nga nagsilbi usab nga interpreter ngadto sa mga Intsik.
Gipapha usab sa 4th ID ang nagsilbing army detachment commander kay giingong nakig-relasyon sa usa ka babayeng konsehal aron proteksyonan ang ilegal nga kalihukan sa kabukiran.
Samtang gusto sa konseho nga dunay ipatuman nga lima ka tuig nga moratorium sa paglugwa’g mining permits ngadto sa mga negosyante sa balas ug grabas sulod sa dakbayan.
Gihimo ni Kag. Roger Abaday,chairman sa committee on environment ang sugyot nunot usab sa rekomendasyon sa DENR-MGB 10 resulta sa illegal mining investigation sa Brgy Tumpagon ug Brgy Tuburan ning syudad.
Miingon si Abaday nga tuyo niini nga matumbok ang mining permittees nga nagtakuban sa quarry operations apan mihimo’g ilegal nga pagpanguha sa mga minerales sa bukiran sa dakbayan.
