CAGAYAN DE ORO CITY – Misaka sa 50 ka panimalay ang naugdaw sa nahitabong sunog sa 12th-28th St., Upper Nazareth ning syudad.
Sumala ni Fire Insp. Sam Lawrence Velarde sa City Fire Department nga paspas nga gilamoy sa kalayo ang mga panimalay tungod kay gama lamang kini sa light materials.
Miingon si Velarde nga nagsugod ang kalayo sa panimalay ni Nida Gomez human mabiyaan ang iyang nilung-ag.
Hinoon,walay naangol nga residente dihang miulbo ang sunog diin may inisyal nga structural damage nga 1.2 million pesos.
Nagpasilong ang mga apektadong pamilya sa Brgy. Nazareth Covered Court.
Samtang natunulan na sa pasiunang tabang ang anaa sa gatusang residente nga biktima sa sunog sa Brgy Nazareth ning syudad.
Kini human paspas nga naka-responde si Nazareth Brgy Kap Junjun Rodriguez ug bisan ang puwersa gikan sa CSWD sa city hall ning syudad.
Miingon si Nazareth Brgy administrator Oming Pimentel nga pagkaon ang prioridad nila nga gitunol sa mga biktima samtang naghatag usab ang city hall sa kagamitang pangbalay isip pasiuna nga ayuda.
Mihangyo usab sila nga kon mahimo dunay maka-donar sa underwears alang sa mga babaye ug lalaki ilabina nga daghan sa mga biktima ang walay nadala sa pag-ulbo sa sunog kagahapon sa hapon.
