CAGAYAN DE ORO CITY-Midangop karon sa grupong Gabriela Northern Mindanao ang 15 sa kapi’g 50 ka Pinoy workers nga kabahin sa gipugos pagpapauli sa gobierno sa Pilipinas tungod sa pagkalugi sa mga kompanya nga ilang gitrabahuan didto sa Kingdom of Saudi Arabia o KSA.
Kini human kutob saad lamang ang gihimo kanila sa gobierno nga hataga’g ayuda ug laing panginabuhian bugti sa ilang pagpamauli dinhi sa rehiyon.
Gibutyag sa Pinoy worker nga si Jonas Rolle nga taga-Lagongong,Misamis Oriental nga hangtod P26-mil cash assistance lamang ang nahatag kanila sa gobierno ug wala na matuman ang educational assistance alang sa ilang mga anak estudyante ug livelihood program nila.
Kini ang hinungdan nga midangop sila sa pundok- Gabriela aron singlon ang saad sa DOLE,OWWA ug DSWD.
