CAGAYAN DE ORO CITY-Nakaabot na sa Iligan City ang dugang armas gikan sa Kampo Krame nga gisaad ni Philippine National Police director Gen. Ronald “Bato” dela Rosa nga ihatag sa Iligan City Police Office.
Matud ni Iligan City Mayor Celso Regencia, dako og ikatabang ang 50 ka M16 rifles, 1 ka browning automatic rifle, 1 ka 60 caliber ug usa ka 30 caliber nga machine gun sa pag-crackdown batok sa mga terorista.
Dugang pa ni Regencia nga iyang ihatag ang mga armas sa mga pulis sa pinakadaling panahon.
Samtang gipasalig karon ni Iligan City Police Office Director Sr/Supt Leony Roy Ga nga mahatagan nila sa mas hugot pang depensa ang katawhan batok hadla sa mga terorista.
Kini human gitugyan na ni PNP chief Dir Gen Ronald de la Rosa ang 50 ka M-16 rifles,browning automatic rifle, 60 caliber ug 30 caliber machine guns kang City Mayor Celso Regencia kagahapong adlawa.
Mismo usab si PNP regional director C/Supt Tim Pacleb ang mihatod sa maong mga armas kang Regencia nga personal niya nga gihangyo kang De la Rosa alang sa seguridad sa katawhan sa Iligan City.
