CAGAYAN DE ORO CITY – Nabawian sa kapolisan ang 51 ka tawo sa halos dos -milyones pesos nga balor sa gitoohang shabu ug marijuana sa magkalahi nila nga operasyon sa Northern Mindanao ning semanaha.
Gitaho ni Police Regional Office 10 spokesperson Major Joann Navarro diin nakabase sa Kampo Alagar nga unang naglusad sa magkalahing operasyon ang ilang lower units batok sa nagkadaiyang kriminalidad diin 159 ka indibidwal ang nasignit.
Sa 42 ka operasyon nga nalusad sa PRO 10’s lower units, kabahin na niini ang pagkadakpi sa 51 ka suspected pushers diin nabawi gikan kanila ang 284.622 gramos sa gitoohang shabu ug 55 gramos usab sa marijuana.
Gawas sa anti-illegal drugs operation, anaa sa 25 ka indibidwal ang nasakote sa pagkalambigit sa illegal nga pasugal diin nabawian sa 10-mil pesos nga balor sa kagamitan sa illegal gambing.
Nahipos na usab ang 64 ka tawo nga adunay kasamtangang mga kasong gipang-atubang diin unom ka kanila most wanted persons.
Samtang mitala usab sa sobra 2 milyones pesos nga kantidad sa smuggled cigarettes ang nakompiskar sa magkalahing operasyon sa mga otoridad sa rehiyon.
Nag-atubang na usab sa kasong pagsupak sa anti-illegal mining law ang 12 ka suspected illegal miners.
