CAGAYAN DE ORO CITY – Nadakpan sa nagkadaiyang police lower units ang 54 ka suspected drug pushers ug tiggamitan sa gilusad nga 47 ka magkalahing operasyon diin nakompiskar ang P1.1 milyon nga estimated market value nga gitoohang shabu ug marijuana sa Northern Mindanao.
Kini may kalabutan sa gipakusog nga anti-criminality operations sa Police Regional Office 10 diin tipik ang 54 ka personalidad sa 114 ka dinakpan sa one-week law enforcement operation.
Namahayag si PRO 10 spokesperson Maj Joann Navarro nga nakadakop usab ang ilang lower units sa upat ka suspek nga nalambigit sa ilegal nga pasugal.
Nahipos usab ang 50 ka tawo nga naglakip sa lima niini nga tratado nga most wanted persons.
Nakadakop usab ang PRO 10 sa tulo ka indibidiwal sa ilang gilusad nga Kontra-Boga ug dunay pito ka armas ang nabawi.
