Duha ka bug-at nga pagpaningil ang dalhon sa mga protestador nga mupadulong sa kadalanan karong adlawa, Lunes, Setyembre 21—ang paghandom sa ika-54 nga anibersaryo sa Martial Law ug ang pagpadayag sa kasuko batok sa bag-ong korapsyon sa nasod.
Mao kini ang gipahayag ni Rauff Sissay sa grupong Bagong Alyansang Makabayan kun BAYAN, diin gitin-aw niya nga magkahiusa ang mga mamumuo, mag-uuma, ug mga tawo sa simbahan sa dakbayan sa Davao aron paundangon ang dakong kawat sa pondo sa nasod.
Gidugang ni Sissay nga napuno na ang publiko sa mga anomalya sa flood control project ug sa paggamit sa confidential ug intelligence funds sa ilalom sa pagdumala ni Presidente Ferdinand Marcos Jr. ug Bise Presidente Sara Duterte.
Tungod niini, nagpasidaan ang grupo nga dili na magpailad ang katawhan ug magpadayon ang ilang pagprotesta hangtod nga dili patubagon ug masilotan ang tanang opisyal sa gobyerno nga nakasala.
