CAGAYAN DE ORO CITY – Nawala sa tunong ang administrasyong Duterte.
Kini ang nakita ni kanhi IBP Misamis Oriental-CdeO chapter president Atty. Eddie Cuaresma sa performance ni Pres Rodrigo Duterte sa pagpadagan sa nasud.
Gibutyag ni Cuaresma nga daghang tawo sa gobyerno ang gapaburan ni Pres Duterte bisan nga may nahimong kasaypanan sama ni NCRPO chief Major General Debold Sinas ug DoH Sec Francisco Duque III, ingon man ang pag ilog sa China sa West Philippine Sea samtang ang jeepney drivers nga pobre maoy gipriso.
Hinoon gidayeg niini ang presidente sa pagkibatok sa kriminalidad ug illegal nga droga.
Samtang bagsak si Duterte sa panglantaw sa pipila ka grupo sa mga mamumuo sa rehiyon.
Kini human pakyas niining mahisgutan sa iyang SONA kagahapong adlawa ang ika-ayo sa mga yanong nangempleyo.
Apan gibutyag ni ALU-TUCP regional vice president Atty. Procolo Sarmen nga sa kinatibuk-an, 6 ang ilang grado kang Duterte.
Una nang nangandoy ang grupo nga usbawan ang mga suhulan sa mga mamumuo sa nasud.
Sa pikas bahin,dismayado si IFI Bishop Felixberto Calang sa performance ni Duterte sa iyang ika-lima nga SONA.
Kini gumikan kay napakyas si Duterte sa paghisgot sa solusyong pangkalinaw sa Mindanao batok sa mga rebeldeng New Peoples Army.
Gibutyag ni Calang nga isip peace advocate, siya nagtoo nga ang peace negotiations lamang ang bugtong solusyon aron masulbad ang problema sa kapobrehon sa nasud.
Siya miingon nga gikalimtan ni Duterte ang iyang pasalig niadtong 2016 nga dili undangan ang peace talks.
