CAGAYAN DE ORO CITY – Gusto ni City Mayor Oscar Moreno madunggan gikan kang Pres Rodrigo Duterte ang komprehensibong solusyon kon unsaon pagsulbad ang krisis nga dala sa coronavirus disease sa nasud.
Kini samtang mohimo sa ika-lima nga State of the Nation Address o SONA si Duterte sa Batasang Pambansa unya sa hapon.
Miingon si Duterte nga higayon kini sa presidente nga ipaabot sa katawhan ang direkta nga hangyo nga tabangan siya pagpakig-away batok sa bayrus nga miapektar na sa sobra 80-mil ka tawo sa nasud.
Samtang mihatag sa 50-50 nga inisyal nga grado ang pipila ka transport group sa nahimong performance ni Duterte sa iyang pagdumala sa nasud.
Miingon si Joel Gabatan, regional coordinator sa National Confederation Transport Union nga sila ang nahimong alaut sa programa ni Duterte nga modernization sa mga Public Utility Jeepney.
Apan giklaro ni Gabatan nga dili sila supak sa maong programa sanglit maoy ilang gusto nga mahatagan ang ilang sektor sa igong pagtagad.
Naglaum sila nga ilakip ni Duterte sa iyang report ning adlawa ang mahimong kahimtang sa transport sector pag-abot sa tuig 2021.
Samtang walay ikahatag nga grado ang pipila ka grupo sa mamumuo sa kinatibuk-ang programa ni Pres Rodrigo Duterte sa pagdula niini sa nasud.
Gibutyag ni ALU-TUCP regional vice president Atty. Procolo Sarmen nga maayo ang nahimo ni Pres Duterte sa hisgutanan sa pakig batok kriminalidad ug kurapsyon.
Apan matud ni Sarmen nga pakyas ang administrasyong Duterte pagsulbad sa problema sa pagpanarbaho sa nasud sama nalang sa pag padayon nga kontraktwalisasyon.
Samtang halos perpekto ang gihatag nga grado sa Motorcycle Riders sa performance ni Pres Rodrigo Duterte sa Pilipinas.
Kini bisan nga wala sila mahimoot sa kamanduan sa IATF nga pagbutag anti-laway shield o barrier sa mga motorsiklo bisan mag-asawa lamang ang magbackride.
Gibutyag ni Motorcycle Riders CdeO chapter convenor Jun Tupag nga gusto nilang mabati sa State of the Nation Address ni Pres Duterte ning adlawa ang mahitungod sa pagbackride sa motorsiklo.
Sa pikas bahin,gihagit ni Citizens Watch for Good Governance o CWGG-10 ang ubang sektor nga dili lamang kutob sa pagpanaway ngadto sa mga lideres sa nasud.
Gihimo ni CWGG convenor Atty Antonio Soriano ang apelar nunot sa SONA sa Pres Duterte unya sa hapon.
Miingon si Soriano nga angay tabangan sa tanan ang presidente aron mas mahimong gaan ang pagsulbad sa mga suliran sama sa krisis nga nahatag sa coronavirus disease sa nasud.
Mihatag sa gradong sobra 75 si Soriano sa liderato ni Duterte.Dugtong niini,gi-diskorahe sa Police Regional Office o PRO-10 ang mga raliyesta nga mohimo’g lihok-protesta atol sa State of the Nation Address o SONA ni Pres Rodrigo Duterte karong adlawa.
Miingon si PRO-10 spokesperson Lt Col.Mardy Hortillosa nga mas maayo nga paminawon una ang unod sa SONA sa presidente sa nasud ayha mohimo’g reaksyon
Gani, nagpahimangno kini sa mga raliyesta nga nagpabilin pa ang pandemya sa Covid-19 ug mas maayo nga likayan ang panagtapok aron malikayan usab ang takod sa bayrus.
