CAGAYAN DE ORO CITY – Gilab-as sa liderato sa militar ug kapolisan ang dakong sakripisyo sa sobra gatos ka sakop state forces nga mibuhis kinabuhi aron lamang dili mailog sa teroristang Maute-ISIS ang Marwi City,Lanao del Sur takdo lima ka tuig ning adlawa.
Miingon si Philippine Army chief Lt Gen Romeo Brawner Jr nga dunay presentasyon sa exhibits diin langkuban kini sa mga kagamitan nga maoy nakapapuhag sa mga terorista sa miaging Mayo 23 hangtod Oktubre 17,2017.
Siya miingon nga gawas sa mga paghalad sa mga pag-ampo ug pangaliya,may mga aktibidad usab nga buhaton alayon sa maong pagdumdom sa ikalimang tuig sa pagsilbing gawasnon sa Marawi City.
Samtang gipadali na ni Lanao del Sur 1st District Cong. Zia Alonto Adiong ang pagpabalik sa mga residenteng Maranao nga apektado sa lima ka bulan nga gubat tali sa gobierno ug teroristang Maute-ISIS sa Marawi City.
Kini samtang naabtan na sa lima ka tuig apan pabiling libuang pamilya pa gihapon ang nag-antos sa transtiry shelters kay wala pa’y mga balay nga mabalhinan sukad nahitabo ang kagubot.
Miingon si Adiong nga dili lamang rehabilitasyon sa mga kagamitan nga naguba sa giyera apan ang pagpabalik sa normal nga kalihukan ang ilang gusto mahitabo alang sa taga-Marawi City.
Hisayrang kabahin ang pamilya sa kongresista ang apektado sa dihang gisudlan sa mga terorista ang sentor nga bahin sa maong dakbayan.
