CAGAYAN DE ORO CITY – Mitala sa pasiunang unom ka kaso sa firecracker ug indiscriminate firing incidents ang kasaulugan sa pasko ug sugat sa bag-ong tuig sa Northern Mindanao.
Kini subay sa impormasyon nga gilugwa sa Dept of Health 10’s Regional Epidemiology, Surveillance and Disaster Response Unit (RESDRU) atol sa maong mga kasaulugan.
Gibutyag sa Bombo Radyo ni Dra. Stephanie Grace Zamora sa DoH – 10 nga lima sa mga nabuthan ang dunay kalambigitan sa firecrackers samtang ang usa naigo sa sa-ag nga bala sa kalibre 45.
Maoy gitumbok ni Zamora ang duha ka nabuthan sa pabuto sa Misamis Oriental ingon man tulo sa Bukidnon sa pagsugat sa bag-ong tuig.
Siya miingon nga lahi usab kadtong 13-anyos nga batan-ong lalaki nga naigo ang kamot sa kalibre 45 nga armas samtang naki-bibo sa pagsaulog sa pasko sa Maramag,Bukidnon.
Hinoon sa maong mga biktima,walay nataho nga nakabsan sa kinabuhi apan gilayon naatiman sa nagkadaiyang mananambal ang mga biktima sa ilang mga lugar.
Dumduman usab nga sa pagsaulog sa pasko ug pagsulod sa bag-ong tuig 2022,gikataho kaniadto ni Dr. Tristan Jediah Labitad sa Non- Communicable Diseases Cluster sa DoH 10 nga dunay unom ang biktima diin usa niini kadtong batang babaye nga naigo-patay sa sa-ag nga bala gikan sa lungsod sa Lala, Lanao del Norte.
