CAGAYAN DE ORO CITY, Philippines – Gilamoy sa kalayo ang unom ka panimalay sa Zone 4 Kamuning Barangay Carmen ning syudad karong hapon lamang.
Hurot ka ugdaw ang mga balay nga gipanag-iya nila Jaraula Emmaline, nga may pito ka miyembro sa pamilya; Matildo Tabanao Jr, nga dunay lima ka miyembro; Arjie Jabla ug Cliff Bersula nga pulos dunay tag-tulo ka miyembro sa pamilya.
Sa pikas bahin, partially burned ang balay nga gipanag-iya nila Christ Castro nga may unom ka sakop sa pamilya ug Berly Ambal nga dunay duha ka miyembro sa pamilya.
Gibutyag ni Carmen Sub Fire Station Fire Investigator SFO2 Davy Mabulay nga siyam ka fire trucks ang miresponde sa area aron paspas makontrolar ang kalayo.
Gibana-bana sa BFP nga mukostar sa P300,000 ang damyos sa istruktura gikan sa unom ka nasunog nga balay.
Segun sa City Social Welfare and Development (CSWD) kasamtangang nagpasilong sa Macanhan National High School ang 26 ka indibidwal nga nasunugan.
Paspas nga miabot ang tabang-hinabang gikan sa opisina ni Cagayan de Oro 1st District Representative Lordan Suan.
Hinoon, walay natala nga samaran o namatay tungod sa sunog.
Blangko pa ang mga otoridad kung unsa ang hinungdan sa insidente.
Kini na ang ikatolong sunog nga narespondehan sa BPF ning adlawa.
