CAGAYAN DE ORO CITY – Nag-atubang na sa kasong pagbaton sa ilegal nga mga armas,eksplosibo ug pasupak sa election gun ban ang unom ka lalaki nga naglakip sa duha ka kanhi miembro sa Macari Criminal Group nga unang nasikop sa border checkpoint sa Brgy Tagolo,Sultan Naga Dimaporo,Lanao del Norte.
Kini human nabawi-i sa tag-as nga assault rifles ang grupo sa mga kalalakihan sa maong lugar.
Giila ni PRO 10 spokesperson Lt Col Michelle Olaivar ang mga suspek nga sila si Tristan Baguio,govt employee;Resil Revillas nga pulos taga-Midsalip,Zamboanga del Sur;Esmail Wali,Adam Tando nga pulos kanhi sakop sa Macari Criminal Group; Fausto Guinita ug Sangbaan Acut,mga hingkod ang edad ug pulos nagpuyo sa Lanao del Norte.
Miingon si Olaivar nga naaresto ang mga suspek sakay sa sakyanan nga pasulod sa Lanao provinces nga gikan sa Zamboanga del Sur.
