CAGAYAN DE ORO CITY – Natumbok na sa kapolisan ang unom ka suspetsado nga may kalabutan sa pagpusil-patay sa duha ka brgy kagawad diha sa Dominorog, Talakag Bukidnon.
Miingon si Talakag Police Station commander Capt Dominador Orate Jr subay kini sa testimonya sa tulo ka testigo nga may kasayuran sa kamatayon nila ni Kag Lorenzo Pedyaan ug Mauricio Guinto niadtong Lunes sa buntag.
Siya miingon nga lig-on ang pahayag sa tulo ka eye witnesses nga magpamatood nga adunay kalambigitan sa krimen ang unom ka indibidwal.
Gibarugan ni Orate nga ang init nga politika sa maong brgy ang hinungdan kon nganong gipapatay si Pedyaan ug Guinto.
Una nang gibutyag ni Orate mapasaka na nila ang kasong double murder batok sa mga suspek sunod semana.
