(Update) CAGAYAN DE ORO CITY – Gilayong nahuptan sa kapolisan ang unom ka personalidad nga ipaubos sa imbestigasyon aron sutaon kon may kalabutan sila sa kamatayon sa 19 anyos nga kolehiyala sa Zone,4,Brgy Sta Ana,Tagoloan,Misamis Oriental.
Kini aron makakuha’g tukmang impormasyon nga posibleng mosumpay sa sirkumstansiya kon nganong gipatay ang biktima nga si Lady Grace Galo diin unang gitoohan nga gisulaya’g lugos apan kay misukol posibleng nahinaykan.
Namahayag si Tagoloan Police Station commander Major Renz Marion Serrano nga ipaubos nila sa subsob nga imbestigasyon ang maong mga dinakpan sanglit usa kanila nagbaton sa samad sa kamot ug kadudahan usab ang pagsunog sa pipila sa ilang mga senina.
Una nang gipanghuptan sa mga otoridad ang maong lalaki kay sila ang pinakaduol sa lokasyon sa balay diin napalgan ang patay’ng lawas sa biktima.
Nasuta nga mga trabahante nga nagkural sa yuta nga iya sa Phividec ang maong mga dinakpan.
Dumduman nga una nang namahayag ang pamilya sa biktima nga kon kinsa man ang mihimo sa kremin, dili nila pasayloon apan ibilanggo aron mahatagan sa hustisya ang maong kolehiyala.
Si Lady Grace nagsilbi nang 2nd year college sa kursong Bachelor of Science in Business Administration sa Tagoloan Community College.
Aktibong lumilihok sa simbahan ang biktima kinsa makalolooy nga gipatay sa nakasibat nga suspek sa miaging gabii.
Samtang namahayag usab ang mga dinakpan nga wala sila’y kasayuran batok sa mga gipasangil kanila kay igo lang sila nagtrabaho sa maong lugar.
Nasayran nga pulos dili taga-Tagoloan ang mga gipangdakop apan gikan dinhi sa syudad samtang ang uban gikan sa El Salvador City,Misamis Oriental.
