CAGAYAN DE ORO CITY – Gipangkasuhan sa pagpanulis ang unom ka mga lalaki gumikan sa ilang paglusob sa pinuy-anan sa aktibong punong barangay sa Purok 3,lungsod sa Kinoguitan,Misamis Oriental.
Kini human paspas nasakote sa tropa ni Kinoguitan Police Station commander Capt Eugene Zambrano ang gisakyan nga Toyota Hi-Lux vehicle sa mga suspek diin nakarga na ang nagkadaiyang valuables ug money denominations pag-abot sa Purok 2,Brgy Esperanza sa maong lungsod.
Gibutyag ni Zambrano nga nasapon ang lokasyon sa mga suspek gamit ang ‘Find My Device’ app sa usa sa mga nakawat nga cellphones.
Kini ang hinungdan nga nalukong sa checkpoint ang maong mga indibidwal ug nasuta nga duha kanila taga-Misamis Oriental ug ang upat gikan pa sa Zamboanga Peninsula sa Region 9.
Pagsaysay sa opisyal nga nakuha sa unang suspek ang klase-klaseng cellphones,nagkadaiyang money currencies nga naglakip sa Philippine peso,Indonesian Rupia,Cambodian Riel,Colombian Peso,ID cards,ATM cards,bags,mga sinina ug mga kalo.
Nakuha usab sa uban mga suspek ang mismong sakyanan nga gigamit nila pagsibat, mga salapi ug daghang klase sa mga ID.
Dugtong niini,gipahalipayan ni Misamis Oriental Police Provincial Office Director Col. Wilbur Salaguste ang kaabtik sa iyang mga pulis batok sa mga kawatan nga nangatake sa pinuy-anan sa brgy kapitan sa mismong kadlawon sa May 12 elections.
