CAGAYAN DE ORO CITY – Gilayong gipaubos sa ‘culling’ o pagpatay ang 600 ka baboy nga positibong natakbuyan sa African Swine Fever o ASF sa Brgy Puga-an,Iligan City.
Kini human kompirmaha ni Dept of Agriculture 10 regional director Carlene Collado nga nasudlan na sa ASF ang maong bahin sa syudad.
Miingon si Collado nga milihok na usab ang mga otoridad nga bantayan nga walay makagawas ug makasulod nga produktong baboy gikan sa brgy aron pugngan nga makasulod sa kasikbit nga mga lugar sama dinhi sa syudad.
Una niini,nagkurambos ang LGU-Iligan,DA-10 ug Northern Mindanao Hog Raisers Association sa ilang ayudang pinansyal aron ihatag sa backyard hog owners bugti sa pagpatay sa ilang mga baboy nga positibo sa ASF.
Samtang gipaniguro sa NorMinHog nga luwas ang mga baboy nga ubos sa ilang pagdumala bisan kon may positibong kaso na ASF sa Iligan City.
Miingon si NorMinHog Pres Leon Tan Jr nga dili basta-basta masudlan ang hog farms kay hugot ang safety protocols nga gipatuman nila niini.
Bugtong apelar sa grupo ngadto sa backyard hog raisers o inato nga nagbuhi sa mga baboy nga dili na pakan-on sa pasaw ang ilang mga binuhi aron dili hingpit mahugno ang industriya dinhi sa rehiyon.
Dugtong niini,gitahasan ni City Mayor Oscar Moreno ang CdeO Anti-Task Force nga hugtan ang mga utlanang bahin sa Cagayan de Oro ug Iligan City.
Miingon si CdeO Anti-Task Force head City Veterinarian Dr Lucien Acac nga mosaka sila sa mga brgy nga katupad sa IIigan City.
Kini aron e-alerto pa ang backyard hog raisers kabahin sa pagkasulod sa ASF infection sa rehiyon.
Samtang gibutyag usab ni Provincial Veterinarian Dr Benjamin Resma nga naglugwa na si Gov Bambi Emano sa mando ehekutibo nga wala na’y pasudlon nga mga baboy nga naggikan sa Iligan City.
Gani,gilayong gipaubos nila sa blood sampling nag mga baboy gikan sa lungsod sa Lugait sa pagsiguro nga dili positibo sa ASF nga makasulod dinhi sa syudad.
