CAGAYAN DE ORO CITY, Philippines – Peligroso sa panglawas ilabe sa mga hinay ang resistensya ang subling pagsaka sa temperarura sa Pilipinas samtang nagkaduol ang Summer.
Kagahapon, dungan nga nanawagan ang government weather bureau ug Department of Health sa publiko batok sa pagsaka sa heat index ilabe na sa National Capital Region, Western Visayas ug bisan dinhi sa Mindanao.
Kagahapon nasinati ang pinakataas nga heat index nga mitala sa 46 degrees sa Metro Manila busa gisuspenso sa mga nag-unang LGU’s ang ilang klase gikan sa tanan lebel sa Malabaon, Las Piñas, Parañaque, Marikina, ug Metro Manila.
Samtang suspendido usab ang tanan klase sa kinder padulong senior high sa Valenzuela ug Caloocan City.
Unang namahayag si DOH Assistant Secretary of Spokesperson Dr Albert Domingo nga kini nga klase sa kainit dala sa mga dautang panahon sama sa easterlies nga pwede muhatag sa dakung epekto sa lawas sa tawo.
Tungod sa easterlies musaka ang heat index busa kasagaran sa mga sakit nga muigo sa katawhan heat cramps, heat exhaustion, ug heat stroke.
Mihatag tambag ang DOH aron malikayan ang mga sakit nga may kalabutan sa init, sama sa pag-inom og daghang tubig, paglikay sa mga ilimnong adunay caffeine ug alkohol, magsunblock, ug paglikay sa pagpabulad sa init gikan 10 sa buntag hangtod alas 4 sa hapon.
Importante nga musul-ob sa mga luag ug gaan nga bisti aron kung adunay sintomas sa paghuot sa dughan, mas dali kini mahatagan sa first aid sa labing duol nga health center.
Kung adunay mga sintomas sa heat-related illnesses, ibalhin sa pasyente sa landong ug bugnaw nga lugar, tangtanga ang sobra nga sinina, ug pagbutang sa cold compress o ice pack sa ulo, nawong, liog, kilikili, pulso, bukung-bukong, ug singit.
Kung ang pasyente wala nawad-an sa panimoot, awhaga kini sa pagpa-imo sa bugnaw nga tubig sa hinay-hinay. Kung grabe na ang kondisyon, kinahanglan nga dalhon dayon ang pasyente sa ospital.
