PC:MisOr PGO
CAGAYAN DE ORO CITY-Gipasigarbo sa Regional Maritime Unit -10 ang ilang malampuson nga pag-rescue sa 63 ka pasahero nga na-stranded human misagyad ang gisakyang roll on-roll off vessel sa Lapinig Island, Balingoan, Misamis Oriental.
Kabahin sa na-stranded ang lima ka bata ug 16 ka crew members nga gimaneho sa ship captain nga si Salvador Maputi.
Matud ni Regional Maritime Unit -10 chief Supt Rick Villanueva nga gikan sa isla sa Camiguin ang Ro-Ro vessel ug padulong sa Balingoan port sa dihang misagyad kini tungod sa kusog nga hangin ug balod.
Samtang mapasalamaton si Villanueva sa tabang sa Misamis Oriental Provincial Disaster Risk Reduction Management Office aron magmalampuson ang pag-rescue sa 63 ka mga pasahero nga na-stranded.
Siya miingon nga gipangulohan mismo sa PDRRMO ang rescue operations sa mga apektadong pasahero.
Hisayran nga walay namatay o naangol sa maong aksidente.
