CAGAYAN DE ORO CITY – Nadakpan sa gipatuman sa kapolisan nga law enforcement operation ang 64 ka personalidad nga adunay nasupak sa nagkadaiyang balaod sa Northern Mindanao ning semanaha.
Kini human nila gilusad ang 30 ka operasyon nga nag-resulta sa pagkasikop sa mga suspek diin 38 kanila nalambigit sa pagpalusot sa ilegal nga droga.
Namahayag si Police Regional Office 10 Director Brig Gen Jaysen De Guzman nga sa operasyon sa ilang tropa, nakompiskar nila ang 146. 595 gramos sa shabu nga adunay estimated street value nga sobra 997-mil pesos.
Gawas sa suspected pushers, nakadakop usab sila sa laing siyam ka tawo nga nalambigit sa ilegal nga pasugal nga nakuhaan sa 4-mil 763 pesos nga gambling items.
Siya miingon nga nakadakop usab sila sa 16 ka personalidad nga adunay mga atraso sa balaod diin duha niini ang gitratar nga most wanted persons.
