Gikompirmar ni Dr. Mark Miso, Medical Officer sa DepEd Cagayan de Oro Division, nga dul-an 70 na ka kaso sa Hand, Foot and Mouth Disease (HFMD) ang natala sa siyudad.
Kini naglangkob sa siyam ka pampublikong tunghaan.
Pinakadaghan ang kaso sa West City ug City Central School, nga may banabana 9 hangtod 11 ka tinun-an nga apektado.
Aduna usab kaso sa Bugo Central School, Agusan, Balulang ug laing tulo pa ka tunghaan nga wala una nganli.
Niadtong Hulyo pa, nagpagawas na ang division sa memorandum aron pasidan-an ang mga tunghaan sa peligro sa HFMD, nga dali matakdan ug delikado ilabi na sa mga gagmayng bata.
Miingon si Dr Miso nga kasagaran maigo sa HFMD mao ang mga bata sama sa kinder garten o elementarya kay paspas sila nakakuhag kagaw gikan sa mga batang kontaminado ang lawas sa HFMD.
Gidasig ang mga ginikanan ug magtutudlo nga magbantay sa sintomas sama sa hilanat, rashes, ug sore throat, ug ipatuman ang limpyo nga palibot, regular nga paghugas sa kamot, ug pag-isolate sa mga bata nga may sintomas aron malikayan ang pagkatag sa sakit.
