CAGAYAN DE ORO CITY-Gikasubo ni City Mayor Oscar Moreno nga dunay kinabuhi sa tawo nga nakalas sa dakong sunog nga nahitabo sa Purok 5,Brgy Puerto sa syudad.
Kini human nalukong ang master baker nga si Edwin Cael,42 anyos,minyo nga nagpuyo sa maong lungsod.
Miingon si City administrator Teddy Sabugaa nga gimando ni Moreno ang pagtabang sa pamilya ni Cael ug bisan ang 67 ka pamilya nga nawad-an sa ilang pinuy-anan.
Dugtong niini,hinagbuon ni Sabugaa ang mga opisyal sa brgy aron matuki ang angay himoon sa kahimtang sa gatusang residente nga apektado sa sunog.
Samtang bisan si Gov Bambi Emano ang gilayong nagpaabot usab sa tabang sa apektadong mga pamilya sa sunog sa Brgy Puerto sa syudad.
Miingon si Puerto Brgy Kap Christian Achas nga dul-ag 70 ka pamilya na ang nalista sa ilang brgy workers diin daghan niini ang nawad-an sa ilang mga balay.
Gitumbok ni Achas nga nagsumikad ang pag-ulbo sa kalayo sa bakery nga gipanag-iya ni kanhi brgy kagawad Darisa Hilodo diin si Cael ang nagsilbing master baker.
Una nang nagsumikad ang kalayo sa gipaandar nga oven samtang nagluto’g pan si Cael hinungdan sa dakong sunog.
Samtang gipanalidpan ni BFP District Fire Marshall Supt Richard Arbutante kon nganong may kalangan ang pag-responde ang mga bombero sa dakong sunog sa Brgy Puerto ning syudad kagahapong adlawa.
Gibutyag ni Arbutante nasubo sila nga dunay residente nga namatay gumikan sa maong sunog.
Giangkon ni Arbutante nga naglisod sila pagsulod kay labihan ka gagmay ang dalan diin wala makasulod ang firetrucks nga nag-responde.
Kini ang ikaduha nga sunog sa syudad ning tuiga diin dunay tawo nga namatay gumikan kay nalukong sulod sa gambalay.Mitala’g inisyal nga 200-mil pesos ang structural damage sa maong sunog.
