CAGAYAN DE ORO CITY – Pormal nang gipadangat sa konseho sa brgy ang ilang komunikasyon sa kapitolyo probinsyal diin nag-kuwestiyon sa katukuran sa PAGCOR sa casino nga gipadagan sa Grand Imperial diha sa lungsod sa Opol,Misamis Oriental.
Kini human gi-bypass sa maong korporasyon ang brgy nunot sa operasyon sa casino nga unang kusganong gisupak sa simbahang Katolika dinhi sa syudad ug lalawigan.
Gibutyag ni Taboc Brgy Kag Amiel Abendan nga tuyo nila nga madunggan ang tinud-anay nga baruganan sa katawhan sa lungsod kon uyon o supak sila sa presensya sa casino.
Una nang gitakda ang imbestigasyon sa Sangguniang Panlalawigan ning bulana kabahin sa maong isyu.
Samtang gihangyo na lamang ni Opol Mayor Max Seno ang simbahang Katolika nga magtinabangay na lamang sa pagsilbi sa katawhan kaysa kontrahon ang pasugal nga casino.
Kini ang apelar sa mayor nunot sa nagkakusog nga pagsupak sa simbahan sa maong katukuran sa pasugalan.
Miingon si Seno nga managsama sila sa simbahan nga nagtan-aw kon unsaon nga makasilbi sa katawhan hinungdang mas maayo nga dili na lisod-lisuron ang mga proyekto sa gobierno sama sa gihingusgan sa PAGCOR sa ilang lungsod.
