CAGAYAN DE ORO CITY – Mitahan ngadto sa giingong New People’s Army – Section 5 South Central Bukidnon – Sub-Regional Command, North Central Mindanao Region ang pito ka miembro sa ALAMARA-CAFGU nga ubos sa Special Force sa Kibawe,Bukidnon.
Subay kini sa pahayag nga giluwatan sa nagpailang tigpamaba nga si Ka Ariel Magbanua sa NPA-South Central Bukidnon Sub-Regional Command.
Nakabase ang ALAMARA –CAFGU sa Sagundanon, Kibawe, Bukidnon.
Gilangkuban kini sa lima ka lalaki ug duha ka babae nga silang Antonio Mansaloon (Team Leader) ug igsoong si Tiano Mansaloon. Robert Pawas, Angel Mandalomon, Angela Pawas ug Elie Mandalomon nga tanan taga Sunipon, Natulungan ug si Jr Limpangan sa Brgy. Sagundanon nga tanan sakop sa lungsod sa Kibawe, Bukidnon.
Ang ilang boluntaryong pagtahan gibunga sa pagpasabot ug panawagan nga talikdan na ang ilang grupong ALAMARA nga gitukod sa Armed Forces of the Philippines tungod kay kini ang gihimong hinagiban aron bungkagon ang panaghiusa sa katawhang lumad ug ilugon ang ilang yutang kabilin aron himoong plantasyon ug minahan.
Miaging tuig pa lang, gusto nang mosurrender si Antonio Mansaloon tungod sa wala matuman sa AFP ang gisaad kanila nga hatagan sila og sweldo ug saktong pagkaon. Pugos usab sila nga gipagiya sa mga operasyong militar sa kabukiran.
Dala nila ang usa ka improvised M79, apil ang 23 ka buhing bala nga grenade launcher; usa ka improvised M16; usa ka garand riffle (serial # 978823); duha ka M14; duha ka Shotgun nga D12; mga buhing bala; magazine; vest; usa ka radio; ug duha ka riffle grenade.
Dugtong niini,wala pa’y gihatag nga pahayag ang tropa sa 4th ID,Philippine Army kabahin sa propaganda nga gilugwa sa mga rebelde.
