CAGAYAN DE ORO CITY – Kasuhan sa Misamis Oriental Maritime Police Station/MARPSTA ang pitok Chinese nationals sa pagsupak sa Philippine Mining Act of 1995/Republic Act 7942 sa piskalya ning syudad.
Kini human pasiunang napaubos sa inquest proceedings ang mga dinakpan sulod sa piskalya nunot sa pasangil nga nalambigit sa illegal mining activities sa bukirang bahin sa Brgy Tuburan sa dakbayan ning semanaha lamang.
Gibutyag ni Police Senior Master Sgt Dante Sarate,imbestigador sa MARPSTA nga nasikop ang lima ka lalaki ug laing duha ka babaye nga pulos Chinese nationals gumikan sa covert intelligence operation kuyog ang 1st Provincial Mobile Force Company,DENR-CENRO Initao,Lantad CMU ug Opol Police Station sa illegal mining site sa lugar.
Siya miingon nga kabahin sa nabawe ang balor 18, 922.500 milyones pesos nga kagamitan sa illegal nga pagmina-mina nga gilakipan sa tag-duha ka hydraulic excavators,rolls of carpets,water pumps,separator,wheel loader,usa a sako sa hinugasang mga balas ug rolyo sa water hose.
Sulti ni Sarate nga dili lang unta mga Tsino ang ilang madakpan apan bisan ang Pinoy workers sa maong minahan apan paspas nakadagan ang mga trabahante palayo sa lugar.
Temporayong gi-kustodiya ang mga dinakpan sa mini-cell sa MARPSTA samtang ang pipila sa mga kagamitang-mina ang anaa sa konseho sa Brgy Tuburan samtang gihikay pa ang pagduso’g kaso.
Gikuptan usab sa Mines and Geosciences Bureau 10 ang ubang ebedensiya alang sa pagtaral sa mga dinakpan sa korte.
Dumduman nga sa miaging katuigan,nakadakop gihapon ang gobierno sa pipila ka Chinese nationals nga nalambigit sa illegal mining activities sa pipila ka brgy sa lungsod sa Opol ning lalawigan.
