CAGAYAN DE ORO CITY-Nag-atubang sa kasong kriminal ang sundalo nga nagmaneho sa armoured personnel carrier o APC nga misungag sa kusog nga dagan sa passenger van sa Purok 15,Poblacion,Manticao,Misamis Oriental.
Kini human nagresulta sa kamatayon sa pito ka Maranao-Muslims nga gikan nagduaw sa ilang pasyente sa usa ka pribadong ospital diha sa Kauswagan sa syudad.
Miingon ang case investigator nga si PO2 Mario Aniñon sa Manticao Police Station nga kabahin sa namatay ang van driver nga si Hadji Amin Bangcola;retired police officer Hadji Latiff Macaumbos;Rey Dacoa Mancao; Siete Guimba Abantas; Jocelyn Oclarit Baldoz;Nobaiza Nobado ug Carmelita Dalogdog Villanea.
Una nang padulong sa Iligan City ang mga biktima sa dihang nabanggaan sa military vehicle nga padulong unta sa Laguindingan Airport aron magkuha’g logistical supply dihang nahitabo ang aksidente sa miaging gabii.
Samtang pakasuhan sa kabanay ang sundalo nga hinungdan sa kamatayon sa pito ka Maranao-Muslims sa aksidente.
Miingon ang ig-agaw nga si Olingan Bangcola nga dili unta mamatay ang van driver nga si Hadji Amin Bangcola kon wala bangga-i ni army T/Sgt Danny Tenezo sa gimaneho niini nga military truck sa maong lugar sa miaging gabii.
Gani,nagpatabang na sila sa ilang mga paryente nga mga opisyal usab sa militar aron maka-esplikar si Tenezo sa gidangatan sa mga nangamatay ug naangol sa aksidente sa miaging gabii.
Si Tenezo ang detinado sa mini-cell sa Manticao Police Station tungod sa panghitabo.
Kritikal usab ang mga kahimtang nila Renzo Von Pagayon;Raima Tangote; Norhaya Ampaan; Hadji Asphia Lanto ug Abdul Latiff Lanto;Reham Dom Lanto;Norjana Dimapinto Domado ug Samsodin Domado nga naka-confine sa nagkadaiyang ospital sa syudad ug lalawigan.
