(Update) CAGAYAN DE ORO CITY – Napatay sa operasyon sa militar ug kapolisan ang pito ka sakop sa Maute-ISIS inspired-Dawlah Islamiyah terror group sa tulo ka adlaw nga engkuwentro sa duha ka barangay nga sakop sa lungsod sa Maguing,Lanao del Sur.
Gibutyag sa Bombo Radyo ni AFP Western Mindanao Command spokesperson Army Maj Andrew Linao nga gawas sa namatay’ng mga terorista,46 ka klase-klaseng tag-as nga armas,22 ka improvised explosive devies ug lima ka kilo nga gitoohang shabu ang nabawi sa tropa sa gobierno sa nailog nga kampo sa mga terorista.
Dugang sa opisyal nga pabiling usa lamang ka sundalo ang walay suwerte nga nakalas ug laing lima ang samaron nga padayong gihatagan sa medikasyon.
Gitugtan na usab nga makabalik sa ilang mga pinuy-anan ang sobra libo ka pamilya nga nanghikling tungod sa airstrike nga gihimo sa militar lokasyon sa mga terorista sa miaging kadlawon sa Martes.
Samtang ipaubos sa DNA sampling ang patay’ng lawas sa pito ka terorista nga namatay sa govt forces nunot sa engkuwentro sa lungsod sa Maguing,Lanao del Sur.
Miingon si Linao nga hugot ang ilang pagduda nga kabahin sa Faharrudin Hadji Satar alyas Abu Zacaria kinsa giila nga bag-ong ‘EMIR’ sa teroristang ISIS sa Southeast Asia ang napatay sa maong engkuwentro.
Gibutyag sa ospiyal nga tuyo unta sa tropa nga isilbi ang warrant of arrests batok kang Zacaria apan mi-resulta sa ngilngig nga engkuwentro.
