CAGAYAN DE ORO CITY- Diriyot maputol ang mga ulo sa mag-amahan nga gigulgol sa 70 anyos nga babayeng suspek gamit ang ‘sanggot’ sa Sitio Magpalit,Brgy Cabalantian,Manticao,Misamis Oriental.
Giila ni Manticao Police Station commander Lt Chance Ramirez ang mga biktima nga si Luciano Loresca,70 anyos ug anak niini nga si Elvie Loresca Bagares,36 anyos,minyo nga pulos residente sa lugar.
Miingon si Ramirez nga daw dunay deperensiya sa huna-huna ang suspek nga si Vivian Loresca hinungdan gitigbas niini ang iyang bana ug anak samtang natulog sa ilang pinuy-anan.
Gani,giapil pa pagtigbas sa suspek ang iyang tulo ka apo nga menor de edad apan nakadagan ug nangayo’g tabang sa mga silingan.
Una niini,gikaguol sa suspek ang kamatayon sa ilang anak lalaki rason nga pila ka adlaw nang wala mokaon.
Dugang ni Ramirez nga kasuhan gihapon sa double parricide ug multiple frustrated parricide ang suspek pagpatay sa iyang bana ug anak sa piskalya sunod semana.
Kini bisan kon gitoohan nga dunay deperensiya sa huna-huna si Loresca kinsa detinado na sa prisohan sa Manticao,Misamis Oriental.
Saysay ni Ramirez nga itugyan na lamang nila sa mga doktor ang pagdeterminar kon tinood nga dunay apan sa pangutok ang suspek.
Una niini,wala angkona ni Loresca nga siya ang mipatay sa mga biktima ug gitudlo ang demonyo nga daw mihimo niini.
