CAGAYAN DE ORO CITY-Gipangitaan ni Barangay 17 Kagawad Alvin Llagas si incumbent Kapitan Bingo Ebabacol sa dumptruck nga gipalit sa barangay apan kalit kining nahanaw.
Si Llagas miingon nga nahibulong siya tungod kay kalit nawala sa ilang barangay ang dumptruck nga gipalit sa kantidad nga 700,000.
Nahibulong usab si Llagas kung nganong nakaparada na sa junkshop ang dumptruck nga daut apan wala gamita.
Apan gitawag ni Ebabacol nga bakak ug pagpangdaut lamang ang akusasyon ni Kagawad Llagas.
Giangkon sa kapitan nga nakaparada sa junkshop ang dumptruck tungod kay nagguba kini sa pag-panerbisyo sa katawhan sa ilang lugar.
Dugang niini nga iyang pangitaa’g paagi nga mapalit ang mga gikinahanglang pisa aron kini subling makadagan.
Gihagit ni Ebabacol si Llagas nga kun ugaling matul-id ang dumptrak, iya kining ipasakay, payongan ug i-parada sa tibook Barangay 17.
